“சட்டங்களால் மட்டுமே சாதி பேதத்தை ஒழித்துவிட முடியாது. அந்த உணர்வை அகற்றும் மாமருந்து மனமாற்றம் என்பதை மறந்துவிடலாகாது.”

“உள்ளத்தோடு ஒன்றிக் கலவாத எந்த ஒரு பணியும், நிரவப்படாத பள்ளமாகத்தான் இருக்கும்.”

“அதிகார வர்க்கம், முள் நிறைந்த ரோஜாவாக இருக்கலாம். முள்ளம்பன்றியாக சிலிர்த்துக் காட்டக்கூடாது.”

“கோபம் கொள்வது தீது. தன் இனத்துக்கு அழிவு வரும்போது, கோபம் கொள்ளாமலிருப்பது பெரும் தீது.”

“மிஞ்சினால் கெஞ்சுவது எப்படிக் கோழைத்தனமோ, அதைப்போன்றதுதான் கெஞ்சினால் மிஞ்சுகிற வீரமும் ஆகும்.”

“நமது இலட்சியப் பாதையில் நடைபோட வருவோரைத் தடையின்றி வரவேற்போம். ஆனால், அவர்கள்தான் இந்தப் பாதையையே அமைத்தவர்கள்போலக் காட்டிக்கொள்ளும்போது வாய்விட்டுச் சிரிப்போம்.”

“இந்தியாவில், பெரும்பான்மை – சிறுபான்மை என்ற இரு பிரிவினர் மாத்திரமல்ல, இன்னொரு பான்மையும் இருக்கிறது. அதாவது, இந்த இருபான்மையினரையும் வாழவிட அனுமதிக்காத விஷப்பான்மை.”

“ஒரு மெழுகுவர்த்தியைக் கொளுத்தினால், அதைக்கொண்டு ஆயிரம் விளக்குகளை ஏற்ற முடியும். அறிவொளி பெற்ற ஒரு பெண்ணாலும் அது முடியும்.”

“உணர்ச்சியே இல்லாதவர்க்கு உயிர் இருந்தும் பயனில்லை. உணர்ச்சி வயப்படுவோருக்கு உயர்வு இருந்தும் பெருமையில்லை.”

“மேகங்களே! சூரியனால் உருவான நீங்கள், அந்தச் சூரியனையே மறைக்கிறீர்கள். மறந்துவிடாதீர்கள், காற்று வீசத் தொடங்கினால், கலைந்தும் கரைந்தும் மறைந்துவிடுவீர்கள்.”

“ஆதிக்கம் செலுத்துகிற மொழி, குயிலாகக் கூவி வந்தாலும் – மயிலாக ஆடி வந்தாலும் மயங்கிடோம். அன்னைத் தமிழ் காப்பதற்கு ஆவி தரவும் தயங்கிடோம்.”

“பல்வேறு தேசிய இனங்களையும் மொழிகளையும், கலாச்சாரங்களையும் கொண்ட ஒரு நாட்டின் ஒருமைப்பாடு, இவை அனைத்தையும் சமமாக மதிப்பதில்தான் இருக்கிறது.”

“சாதிப்பற்றும், சமயத்துக்குத் தக்க கொள்கைப் பற்றும் கொண்டோரிடம் இலட்சிய உறுதியை எங்கனம் எதிர்பார்க்க முடியும்?”

“இன உரிமை, மொழி உரிமை எவரிடமும் யாசித்துப் பெறுவது அல்ல. இன்னுயிரைப் பணயமாக வைத்துப் போராடிப் பெற வேண்டியவையாகும்.”

“பொதுவாழ்வில் ஈடுபட்டவர்கள், காற்றடிக்கும் பக்கமெல்லாம் திரும்புகின்ற காற்றாடியைப்போல் ஆகிவிடக்கூடாது.”

“ஆத்திரம், அறிவை மறைப்பது மட்டுமல்ல, அழிவையும் விரைவுபடுத்தும்.”

“இளைய தலைமுறையே, எழுவாய். செயப்படு பொருள் பயனிலையேல் விழுவாய். அறிவில் மூத்தோரைத் தொழுவாய். அரிய பயன் காண ஆழ உழுவாய்.”

“கொள்கைக்காக வாழ்பவர்கள், அந்தக் கொள்கை காத்திடும் போரில் சில களங்களை இழக்க நேரிடலாம். அதற்காகப் போரிலிருந்தே புறமுதுகிட்டு ஓடிவிடமாட்டார்கள்.”

“மனிதனை பண்படுத்தப் பயன்படாதவரையில், மதம் என்பது யானைக்கு வரும் ஒரு நோயைக் குறிப்பிடுவதாகும்.”

“கடைசி நம்பிக்கையாக இருக்கின்ற நீதியும் கைவிட்டு விடும்போதுதான், சமுதாயம் புரட்சியின் மீது நம்பிக்கை வைக்கிறது.”

“மனிதனை பண்படுத்தப் பயன்படாதவரையில், மதம் என்பது யானைக்கு வரும் ஒரு நோயைக் குறிப்பிடுவதாகும்.”

“கடைசி நம்பிக்கையாக இருக்கின்ற நீதியும் கைவிட்டு விடும்போதுதான், சமுதாயம் புரட்சியின் மீது நம்பிக்கை வைக்கிறது.”

“துணிவு இருந்தால் துக்கம் இல்லை. துணிவு இல்லாதவனுக்கு தூக்கம் இல்லை.”

“ஒடுக்கப்பட்ட மக்களின் சமூக ரீதியான இட ஒதுக்கீட்டை ஒழிப்பதற்காகவே, உள்நோக்கத்துடன் சாதியை ஒழிப்பதாகப் பேசுவது ஒரு சதிச் செயல் ஆகும்.”

“வன்முறை எப்போது தலையெடுக்கிறது? ‘மெய்’ எழுத்து தாக்கப்பட்டு, ‘உயிர்’ எழுத்து அகற்றப்படும்போது, எஞ்சி நிற்பது ‘ஆய்த’ எழுத்துத்தானே!”

“எதிர்க்கட்சிகளை அறவே அழித்துவிட முனைவது, ஜனநாயகமென்னும் நாணயத்தில் ஒரு பக்கத்தையே தேய்த்து மறைத்துவிடுவதைப் போன்றது.”

“சாதி, மத வெறி உணர்வு என்பது, சமத்துவம் எனும் பசும்பாலில், ஒரு துளி விஷம் கலந்தது போலாகும்.”

”ஜனநாயகத்தில், எதிர்க்கட்சி என்பது நெடுஞ்சுவர்போல அசையாது நின்றால், ஆளுங்கட்சி என்ன பேசினாலும் அதைத்தான் எதிரொலித்துக் கொண்டிருக்கும்.”

“எள் முனையளவு சாதி உணர்வு இருப்பினும், அது முள் முனையாக மாறி சமுதாயத்தின் கண்களை குத்திக் குருடாக்கிவிடும்.”

“எல்லோருக்கும் நல்லவனாக இருப்பதும் முடியாது. எல்லோருக்கும் பகைவனாகவும் கூடாது.”

”எதையும் அப்படியே நம்பிவிடுவது பைத்தியக்காரத்தனம். ஆழமாக ஆராய்ந்து அதன்பின் முடிவுக்கு வருவதே பகுத்தறிவு.”

“சாதிப்பற்று கொண்டு, அதனால் பேதங்களை வளர்க்கிற ஒருவன், தன்னை பகுத்தறிவுவாதி எனக் கூறிக்கொண்டாலும், அவன் ஓராயிரம் சனாதனிகளுக்குச் சமமானவனே.”

“விடுதலையை இழந்துவிட்டால்கூடப் போராடி மீட்டுக்கொள்ள முடிகிறது. சுயமரியாதையை இழந்துவிட்டால், அது தரையில் சிந்திய பால்தான்.”

“நன்மைகள் கோடி விளைவதாய் இருப்பினும், அந்த விளைச்சலை வன்முறைக் கழனியில் காண முனைவது, மனித நேயப் பண்பாட்டுக்கு முற்றிலும் மாறுபாடான காரியமே ஆகும்.”

“போலித்தனங்களும், ஏற்றத் தாழ்வுகளும், சமுதாயத் தருவைப் புரையோடி அரித்துக் கெடுக்கும் புல்லுருவிகளாகும்.”

“அறிவு, ஆற்றல், அழகு, புகழ், செல்வம் அனைத்தும் பெற்றிருந்தாலும், ‘வாய்மை’ இல்லாத மனிதர் அரை மனிதரே.”

“ஆச்சரியக் குறிகள், கொஞ்சம் வளைந்தால் கேள்விக் குறிகள் ஆகிவிடும். கேள்விக் குறிகள், கொஞ்சம் நிமிர்ந்தால் ஆச்சரியக் குறிகள் ஆகிவிடும்.”

“அளந்து பேசு, அதற்காக அளக்காதே. நினைத்துப் பேசு,
நினைத்ததையெல்லாம் பேசாதே.”

“புத்தகத்தில் உலகைப் படித்தால் அறிவு செழிக்கும்
உலகத்தையே புத்தகமாய்ப் படித்தால் அனுபவம் தழைக்கும்.”

“அணு அளவுகூட இதயமில்லாத ஒருவருக்கு
ஆகாயம் அளவு மூலையிருந்து என்ன பயன்?”